Djemtë, Burrat e Rinj, dhe Burrat

Përkthyer nga The Standart Bearer

“Unë u shkruaj juve o djema të rinj…”

Ku jeni, o djem? A po transformoheni në burra të rinj?

Ku jeni, o burra të rinj? A po transformoheni në burra?

Çfarë lloj pyetjeje është kjo? A nuk është kjo diçka e natyrshme? A nuk rriten djemtë në burra të rinj, dhe burrat e rinj në burra?

Jo, nuk është kështu. Burrat duken më të gjatë, më të mëdhenj, dhe më të rritur se më të rinjtë. Por vëzhgoni dhe dëgjoni. Duke dëgjuar gjuhën e tyre dhe duke parë veprimet e tyre, ju do të bindeni se brenda lëkurës së shumë burrave të rritur gjenden vetëm djem. Ata janë më të interesuar për lojëra të çdo lloji sesa për realitetin. Ata janë më të interesuar të luajnë sesa të punojnë.

Mëkati e ka prekur thellë procesin e rritjes dhe pjekurisë. Shumë burra rebelohen hapur kundër kërkesave që Zoti ka vendosur mbi ta. Ata braktisin shtëpitë dhe familjet e tyre në favor të “shokëve” ose “miqve.” Ata shkelin betimet e martesës dhe të pagëzimit, sepse thjesht ndiejnë nevojën të çlirohen nga përgjegjësitë. Ose, siç e shpjegojnë, ata nuk mund ta përballojnë presionin mbi ta. Ose duan më pak mërzi dhe më shumë emocion.

A e ka ndikuar mëkati kuptimin tënd për rritjen dhe pjekurinë e duhur? A është futur kjo mënyrë mëkatare e të menduarit në mendjen tënde? Ki kujdes!

Çfarë mendoni? Çfarë mendoni ju, o të rinj, për të ardhmen tuaj? Cilat janë synimet tuaja? Të jeni burra të perëndishëm? Në kishë? Në shtëpi? A është synimi juaj të jeni një drejtues i përgjegjshëm në shtëpinë tuaj, për gruan dhe fëmijët që Zoti mund të ketë kënaqësinë t’ju japë? A është synimi juaj të jeni një drejtues i qëndrueshëm dhe i pjekur në kishë, duke përdorur forcën dhe aftësitë tuaja për kujdesin e shtëpisë dhe të kishës suaj?

Apo synimi juaj është vetëm të jeni më i miri në ekipin tuaj sportiv? Të arrini rezultatin më të lartë ose nivelin më të lartë në lojën më të fundit elektronike? A është synimi juaj që të keni më shumë miq ose të jeni ai për të cilin flitet më shumë? Ndjekja e këtyre gjërave, duke i bërë ato synime, është e dëmshme dhe e rrezikshme. Ato janë një formë idhujtarie, duke e bërë shërbëtorin zot. Çfarë vlere kanë ato në sytë e Zotit? Çfarë vlere do të kenë ato pas disa vitesh? Është e habitshme që gjërat që të rinjtë i çmojnë kaq shumë bëhen kaq të pavlera në pak vite. Fatkeqësisht, do të dëgjoni disa burra që, dhjetë vjet më vonë, mburren për atë që kanë bërë në shkollën e mesme.

Ju, o të rinj, keni aftësinë të vendosni një synim, madje edhe një synim që është disi larg. Ju keni aftësinë të përdorni forcën dhe aftësitë tuaja për ndjekjen e atij synimi. Dhe ju keni aftësinë të vazhdoni përpara drejt atij synimi pa u shpërqendruar. Aftësitë e duhura janë aty. Por ruajuni nga synimet e gabuara dhe të pavlera.

Shikoni Predikuesin 11:9: “Gëzohu, pra, o i ri, në rininë tënde; le të gëzohet zemra jote në ditët e rinisë sate; ndiq edhe rrugët e zemrës sate dhe pamjen e syve të tu.” Ju djem dhe të rinj jeni thirrur ta çmoni rininë tuaj. Luani! Luani gjatë pushimeve dhe në kohën tuaj të lirë. Bëni gjëra që janë argëtuese, emocionuese dhe të këndshme! Shijoni hobitë dhe zhvilloni aftësitë dhe talentet që përdoren në to. Munduni, luani me top. Shijoni shpejtësinë dhe koordinimin e trupave të rinj që Zoti ju ka dhënë.

Por mbani mend, Fjala e Perëndisë vazhdon: “Por dije që për të gjitha këto gjëra Perëndia do të të thërrasë në gjyq.” “Të gjitha këto gjëra” nuk janë një qëllim në vetvete. Ato janë përgatitje për t’u rritur. Ato janë shërbëtorë, jo zotër; mjete, jo qëllime. Kërkoni një gjykim të mirë nga Perëndia. Mbajini gjërat e rinisë si shërbëtorë dhe si mjete të thjeshta. Ju duhet të jeni në gjendje t’i lini pas kur Perëndia, përmes pjekurisë suaj, do ta kërkojë këtë. Ju duhet ta njihni gjykimin e Perëndisë mbi to, nëse ato i merrni me vete në moshën e rritur: “Sepse rinia dhe mituria janë kotësi” (Pred. 11:10). Do të vijë një kohë kur ju duhet të lini pas, lojërat dhe liritë e rinisë. Kur të vijë ajo kohë, mos i lini me trishtim dhe hezitim. Mbi të gjitha, mos shpresoni në mënyrë të fshehtë për kthimin e atyre ditëve, duke kërkuar ndonjë mënyrë për t’i rikthyer! Pse të dëshironi kotësinë? Fusni në zemër Fjalën e Perëndisë te 1 Korintasve 13:11: “Kur isha fëmijë, flisja si fëmijë, mendoja si fëmijë, arsyetoja si fëmijë; kur u bëra burrë, i flaka gjërat fëminore.”

Ato gjëra të rinisë duhet t’i lini pas. Por mbani mend, ju po i shkëmbeni ato me diçka shumë më të mirë dhe shumë më lavdëruese për Perëndinë: një jetë e jetuar sipas pjekurisë suaj të duhur të dhënë nga Perëndia, duke përdorur plotësisht dhuntitë që Ai ju ka dhënë.

Përdorni forcën e rinisë për t’u përgatitur për burrërinë.

Si të përgatiteni?

Së pari, mbajeni zemrën dhe mendjen tuaj të drejtuar siç duhet. Ju mund të kujtoni kur ishit fëmijë. Çfarë donit të bëheshit? Përveç zjarrfikës, polic apo mjek, ju donit të bëheshit të rritur, si babai juaj. Ju madje luanit sikur ishit të rritur. Mbajeni këtë si synim dhe përparësi, sidomos mbi lojën dhe argëtimin.

Pastaj, në një mënyrë më praktike, sigurohuni që edhe loja dhe argëtimi juaj të mos bëhen më të rëndësishme se puna dhe përgjegjësitë tuaja. Pse keni pushime? Pse keni verën? Qëllimi i tyre është t’ju rifreskojnë për punën tuaj, për detyrat që Zoti ju ka dhënë. Nëse ju mund ta mbani këtë qëllim në mendje dhe madje të jeni mirënjohës për lojën sepse i shërben këtij qëllimi, atëherë jeni në rrugën e duhur.

Së dyti, përkushtohuni me zell në punën dhe përgjegjësitë tuaja! Hapi i parë për t’u bërë një burrë i vërtetë është që të angazhoheni me forcë dhe përkushtim në punën dhe detyrat tuaja. Largohuni gjithnjë e më shumë nga gjërat që nuk do të kenë rëndësi pas dhjetë vitesh dhe shkoni drejt atyre që do të kenë. Në këto gjëra që kanë rëndësi, investoni forcën dhe aftësitë që Zoti ju ka dhënë. Në këtë mënyrë ju po udhëhiqni veten. Ju po mësoni në të njëjtën kohë se çfarë do të thotë të jesh drejtues në kishë dhe në shtëpinë tuaj të ardhshme. Ju do të bëheni gjithashtu më të sigurt në përdorimin e aftësive që Zoti ju ka dhënë. Ju po i provoni dhe vërtetoni ato, dhe këto aftësi që do të jenë shumë të vlefshme më vonë.

Së treti, drejtoni veten në zemrën dhe shpirtin tuaj. Këtu njohja e vetes është thelbësore. A e dini kush jeni? Kush jeni brenda vetes suaj? Cilat janë drejtimet dhe prirjet e zemrës suaj? Ju duhet të jeni në gjendje të shihni brenda vetes.

Për të parë brenda vetes kërkohet drita e Fjalës së Perëndisë. Libri i Fjalëve të Urta është i mrekullueshëm për të dhënë këtë dritë. Ai flet për rrugën e të drejtit, rrugën e të urtit dhe gjithashtu rrugën e budallait. Aty ka dritë për t’ju udhëhequr në jetën tuaj të jashtme. Por Fjala e Perëndisë jep shumë më tepër. Ajo jep dritë për të ndriçuar brendësinë. Shihni brenda vetes tuaj me atë dritë. Cilat rrugë marrëzie dhe budallallëku janë në zemrën tuaj? Cilat rrugë urtësie dhe drejtësie janë aty?

Kjo lloj njohje kërkon edhe veprim. Ato rrugë të marra në ju, që i shihni në dritën e Shkrimit—largojeni zemrën tuaj prej tyre. Konsiderojini ato të neveritshme. Rrugët e drejtësisë dhe të urtësisë që tregohen në Fjalën e Perëndisë—drejtojeni zemrën tuaj drejt tyre. Konsiderojini ato të bukura dhe të këndshme.

Stërviteni zemrën tuaj në këtë mënyrë: gjithmonë larg marrëzisë dhe drejt urtësisë, gjithmonë larg mëkatit dhe drejt drejtësisë. Në këtë mënyrë ju mësoni edhe të përballeni me veten, ta qortoni veten dhe ta stërvitni veten në rrugën e drejtësisë.

Në këtë mënyrë ju do të jeni si një anije që ka timon dhe një busull, e pajisur për t’u drejtuar drejt një qëllimi dhe synimi. Ju do të jeni në gjendje të qëndroni mirë në rrugën e drejtësisë, duke ndjekur një kurs të drejtë drejt mbretërisë së qiellit. Ju nuk do të jeni si mbi një trap, duke u endur sa andej-këndej, të pasigurt për drejtimin tuaj, të paaftë për të drejtuar veten, viktimë e çdo ere apo rryme që vjen.

Duke qëndruar në këto rrugë ju do të bëheni burra të fortë, me vendosmëri dhe drejtim të qëndrueshëm. Ju do të pajiseni për të udhëhequr dhe drejtuar veten në një mënyrë që i pëlqen Zotit. Ju do të jetoni nga një zemër e shenjtëruar për Të. Por ju gjithashtu do të jeni në gjendje të ushtroni udhëheqje të fortë në shtëpinë tuaj. Gruaja dhe fëmijët tuaj do të mund të kenë besim tek ju, burri i shtëpisë. Ju do të jeni gjithashtu një drejtues i fortë në kishën e Jezu Krishtit. Ju do të mbroheni nga dëshira e kotë për t’u pëlqyer njerëzve. Ju do të ruheni nga ikja përpara shenjës së parë të vështirësisë. Me forcë ju do të jeni në gjendje ta udhëhiqni kishën në të vërtetën, në adhurimin e drejtë dhe në një jetë të shenjtëruar për Perëndinë.

Forca e rinisë… për forcën e burrave, burrave të perëndishëm!